Во 2020 година сведочиме на промени во потрошувачките навики кои се случија преку ноќ заради пандемијата и нејзините последици врз секојдневниот живот. Следењето на потрошувачките навики и предвидувањето на нивните однесувања во идниот период никогаш не било потешко, но за среќа, постои Design Thinking пристапот.
Неконвенционален, универзално применлив и кориснички- ориентиран, овој пристап ги имплементира дизајнерските принципи со цел да се разберат корисниците на продуктите и услугите преку емпатија, односно длабоко интересирање за нивните потреби и проблеми. Кои индустрии имаат најголема потреба од имплементација на ваквиот пристап во моментов?
1. ИТ индустријата
Пандемијата во 2020 овозможи рапидна дигитализација на скоро сите услуги. Намалената активност на економските оператори и преку ноќ променетите однесувања на потрошувачите доведоа до брзи дигитални решенија. Сега е веќе време за согледување на начинот на кој луѓето комуницираат со системите и имплементација на кориснички- ориентираниот пристап Design Thinking со цел да се постигне интуитивно користење на системите, софтверите и алатките кои сме принудени да ги користиме во време на социјална дистанца.
2. Здравствена индустрија
Здравствената заштита е една од најсензитивните индустрии кои го засегаат целото општество и секој поединец. Design thinking овозможува подобрување на искуството на пациентите во здравствените установи, откривање на потребите на модерните пациенти, и иновации во медицината и здравствената заштита.
Design thinking пристапот се фокусира на секојдневието на пациентите и нивната психичка состојба, што е од голема помош за здравствените работници кои се фокусираат само на медицинската состојба. На пример, апликацијата Tifli: Parent’s Partner (слична апликација на Фејсбук која покрива конкретна пазарна ниша- новопечени родители) е создадена како резултат на работилниците одржани со трудници, каде се открило дека татковците чувствуваат грижа на совест во врска со нивните сопруги и немаат начин да ги усреќат за време на бременоста и по раѓањето на детето.
3. Малопродажба
Малопродажбата со Design Thinking може да го подобри искуството при интеракција со корисниците, без разлика дали се работи за иновација во поглед на онлајн или офлајн продажба. Физичките продавници може да бидат обновени и иновативни за да го задржат вниманието на купувачите, на пример: виртуелна реалност, онлајн шопинг во физичка продавница, и слични концепти. Може да помогне да се одржи задоволството на купувачите и да се овозможи беспрекорно и безбедно корисничко искуство.
4. Туризам
Туризмот претрпе огромни загуби заради пандемијата. Design thinking пристапот може да помогне во создавање на концепција за тоа како ќе се трансформира туризмот во иднина, односно ги дава одговорите на тоа како ќе се менува туризмот. Фокусот на размислувањето за иднината на туризмот се сведува на: развој и иновации на продуктите, услугите и искуствата и стратешка изградба на одржливи локални бизнис екосистеми кои генерираат локална вредност.
Design Thinking е иновативен пристап за креирање на решенија за човековите потреби и предизвици. Заради тоа се смета дека е универзално применлив, односно секоја индустрија која го применува бележи пораст на лојални корисници и одлични резултати.
