Сандра Костовска го отвора нашиот серијал на смели, креативни и иновативни бизнис идеи на нашиот пазар. A ние со задоволство сакаме да ги поддржиме. Позитивната млада девојка го формира брендот Paper Box и си остварува една желба од детството.
1. Сандра, ти имаш интересна приказна за твоето образование и кариера, раскажи ни го твоето патешествие? Отвори ни ја твојата магична кутија:)
Интересно е тоа што моето образование го започнав во Русија, каде што го завршив првото одделение. Потоа го продолжив моето образование во Скопје, дел од средното образование го поминав во Охридската Гимназија, за на крај повторно да го завршам на Филолошкиот факултет во Скопје. Моетото работно искустство го започнав во фирмата на моите родители каде што го добив целото работно искуство и подготовка да можам да продолжам понатаму.
2. Што е Paper Box и од каде е целата идеја за ваков креативeн и иновативен бизнис?
Paper Box е онлајн платформа каде сите графички дизајнери, архитекти, уметници кои сакаат своите дела да ги пласираат на пазарот, можат да го направат тоа на Paper Box. Идеата за онлајн платформа ја добив од мојата другарка Даниела, која сама го создаде брендот Bastet Noir кој веќе неколку години е онлајн на пазарот. Не само што идеата ја добив од неа туку имав постојана поддршка од неа.
Инаку желба ми беше со години да имам своја книжарница поточно картолерија, продавница само за хартиени производи, но бидејќи модерното време налага се’ повеќе да купуваме онлајн затоа се решив да отворам онлајн продавница за хартиени производи.
3. Како се одлучи за огромен трансфер во кариерата? Кој беше твојот најголем предизвик, а воедно и мотивација да продолжиш напред со твојата идеја?
Желбата да имам книжарница беше главната причина што се решив да направам трансфер во кариерата. Предизвикот е остварување на една своја голема цел и желба која си ја поставив уште пред неколку години, само немаше погоден момент кога да се изреализира. Мотивацијата доаѓа сама по себе особено кога тоа што го правиш им се допаѓа и на другите па те мотивираат да направиш уште повеќе од тоа што си почнал и замислил.
4. Какво беше твоето искуство на пазарот? Кои беа првите импресии?
Сепак многу е рано да зборувам за искуството на пазарот, само неколку месеци постои Paper Box, но досегашното искуство за овие месеци е и повеќе од тоа што очекував во позитивна смисла. Новите контакти со клиентите и соработниците е нешто непроценливо, учиш многу, дознаваш нови информации, работиш под притисок, стрес, успех, се се тоа први импресии.
5. Мрежата на соработници на Paper Box постојано расте, на кој начин доаѓаш до нови контакти? Кои се впечатоците кога ќе слушнат за Paper Box соработка?
Мрежата расте навистина брзо пред се’ благодарение на социјалните мрежи, кои многу ми помогнаа да остварам нови контакти. Многу често доаѓам до нови контакти преку соработниците со кои веќе соработуваме, но и тоа што постојано барам нови контакти и без разлика дали се познаваме или не, стапувам во контакт за соработка, но и обратно. Генерално им се допаѓа идеата, но сепак се работи за соработка и не секогаш секој е расположен да ја прифати понудата. Сепак се работи за работа па нема лутење.
6. За релативно краток период популарноста на Paper Box достигна високо ниво, какви тајни можеш да ни откриеш за твојот успех?
Како што кажав и претходно најмногу ми помогнаа социјалните мрежи, пријателите и познаниците кои несебично споделуваа, зборуваа за Paper Box.
Тајната за успехот до сега каде што стигнав е постојана работа, упорност, посветеност и одговорност, но и пред сe’ круцијалната поддршката која ја имав од најблиските целиот овој период, бидејќи без некои од нив, немаше да постои Paper Box, барем не во ова издание кое што е сега.
7. И за крај што би им препорачала на младите и идните креативни претприемачи?
Да не се откажуваат од својот сон, без разлика колку и да им изгледа во моментот нереален за реализација. Да ризикуваат бидејќи тоа е дел од тајната на успехот, да се осмелат да побараат совет и помош и тогаш чуда се случуваат.
