Изминатата година прославивте завиден јубилеј, одбележавте 15 години од почетокот на работењето на Порше Македонија. 2020та наметна ново секојдневие предизвикано од Ковид кризата само по себе наметна нови стандарди за корисниците речиси од секоја природа. Како една светска компанија како Вашата ги трансформираше своите услуги во рекорден рок за квалитетно да одговори на барањата на клиентите?
-Пандемијата овозможи забрзување на одредени процеси, кои секако мораа да се случат порано или подоцна. Она што е одлика на глобалните компании како нашата, е во капацитетот на човечки, логистички и организациски ресурси за адаптација кон било која ситуација. Пандемијата дефинитивно ја забрза дигитализацијата, но клучот на агилната трансформација е во веќе поставената филозофија на компанијата за континуирани промени. Процесот на континуирано подобрување е темел на нашата работа, а врвното задоволство на клиентите е приоритетот број 1. Пандемијата само ни овозможи побрзо да ги согледаме можностите во време на криза и да се подобриме на поефикасен начин.
Како реагираа Вашите вработените на овие брзи промени, како кај нив се одрази целата ситуација?
-Континуираните промени се дел од нашето секојдневие. Не постои ниту еден ден во Порше Македонија кој е ист. Глобалните текови, кои нашата Групација задолжително налага да се имплементираат и на локално ниво, веќе години наназад се дел од начинот на работа во нашата компанија, па брзите промени немаа ефект на вработените, напротив истите беа целосно прифатени и дисциплинирано почитувани.
Како според Вас (надвор од состојбата со пандемијата) се воведуваат иновации во компанијата во однос на корисниците, на кој начин ги дознавате нивните потреби?
-Филозофијата на врвно задоволство на клиентите е почетната основа при развивањето на процедурите на работењето. При развивањето на сите нови активности, секогаш тоа е примарната цел. Свесни сме за континуираната дигитализација и брзата трансформација на сите сегменти во работењето, но тоа е убавата фасада. Кога имате солидни темели, објектот секогаш ќе биде стабилен.
Она што е многу важно за нас е мислењето на клиентите. Истото се артикулира преку повеќе канали, а се анализира континуирано со цел воведувањето на иновации и подобрувањето на нашата работа да не застане. Нашите клиенти, особено во ера на целосна дигитализација најмногу го искажуваат своето мислење на социјалните мрежи, па затоа нашето правило е дека нема да има порака која ќе остане неодговорена, и на секое мислење или критика ќе делуваме во подобрување на нашите интерни процеси.
Кој е најголем предизвик кај автомобилската индустрија да го задоволи својот корисник?
-Како никогаш досега сме сведоци дека потребите на клиентите се сè покомплексни, а за нивното задоволување, потребна е креативност и оптимизација на процесите. Ако пред 20-тина години, влезевте во ресторан и нарачавте кафе, ќе ви донесеа традиционално македонско кафе, а денеска, со едноставната нарачка кафе, имате понуда на повеќе од 30 различни типови.
Речиси идентична, но многукратко покомплексна е состојбата со автомобилската индустрија. Затоа што комбинациите на опции што се достапни кај возилата овозможуваат секој клиент да вози различно возило. Предизвикот на индивидуалноста и креативноста на клиентите, е истовремено и најголемата мотивација за нас, да испорачаме возила според индивидуалните потреби на клиентите.
Кога сме кај иновациите, како реагираат клиентите на електричните и плаг-ин хибридните автомобили? Кои се нивните најголеми предрасуди во однос на тој тип на автомобили?
-Електрификацијата на понудата на возила е неминовна. Заради се построгите еколошки норми од една страна и заради системски наметната неможност за брзи и драстични промени на големите системи на автомобилските производители. Ние како Порше Македонија се прилагодуваме на условите во кои што работиме. Нашата главна дејност е продажба и одржување на возила и во овие области сме компетентни. Од гледна точка на субјект на пазарот, како локални предизвици со влијание врз електрификацијата на автомобилите ги издвојуваме следните 3 групи: навиките на просечниот купувач на возила, степенот на развиеност на инфраструктурата за полнење, законските регулативи и третманот на електрифицираните/електричните возила наспроти останатите. Секоја група предизвици е во тесна меѓузависност со останатите. Од овие три групи предизвици, веројатно најголемо и најсилно влијание врз другите има третманот на електрифицираните/електричните возила наспроти останатите, надополнет со третманот на употребуваните возила наспроти новите.
Кои се Вашите предвидувања за прифаќањето на електрифицираните возила на нашиот пазар?
-На убаво секој се навикнува. Дури и ако тоа значи делумно менување на стекнатите навики. Во нашата средина прифаќањето на електрифицираните возила очекувано оди побавно отколку во ЕУ, но постои и ќе се зголемува. Имаме многу солиден удел на плаг-ин хибриди во вкупниот волумен на испорачани возила од унапредениот Passat, безмалку 30 %. Ако беше предизвик овој удел да се постигне, уште поголем предизвик ќе биде да се задоволи интересот на пазарот за овој концепт по добивањето конкретен фидбек од сопствениците и по промената на даночниот систем од 1.1.2020, кога се воведе сериозно финансиско оптоварување на плаг-ин хибридите, различно од претходното законско решение. Резимирано, клиентите – сопственици и на електрични и на електрифицирани, конкретно плаг-ин хибридни возила не планираат да се вратат на погонски концепти од минатото.
Што ќе издвоите како особеност за изминатиот период и кои ќе бидат Вашите приоритети за наредните 15 години?
-За успех на една компанија потребно е да имате поставено безвременски цели. Целта во Порше Македонија, која никогаш нема да застари е врвното задоволство на клиентите. Таа цел е нашиот патоказ во работата и ќе биде приоритет и во следните 15, 50, 100 години. Затоа што пред 15 години, Порше во Македонија не дојде по брз успех, туку напротив, дојде за да овозможи долгорочна мобилност на нашите граѓани.
