Позитивното критикување е всушност фидбек за одредена активност, ситуација или однесување кој не зависи од реалниот исход туку се фокусира само на позитивниот дел. На пример, во спортот по изгубениот натпревар (реален исход) тренерот може да ги истакне сите негативности и пропусти кај играчите кои довеле до загубениот меч. Или пак да даде позитивна критика и да истакне што би можело реално да се подобри за да се победи на наредниот натпревар.
Позитивната критика на работното место е секогаш поделотворна отколку негативната. На пример, доколку некој постојано доцни на работа, сосема е непродуктивно да дадеме негативна забелешка која е очигледна.
На пример: Ти секогаш доцниш! Наместо тоа, може да се даде критика со позитивна аконотација и тон. Целта е да се поттикне вработениот да не доцни на важни состаноци.
Позитивниот критицизам е важна вештина на лидерите, кои го користат за мотивација и влијание на останатите.
Лидерите сакаат да им помогнат на другите да се развиваат, да учат и да напредуваат. Но, тоа не би било можно со негативни коментари и фокусирање на недостатоците наместо на позитивните страни кај луѓето.
Во работната атмосфера во која владее позитивна култура, позитивните критики се постулат на успешноста на компанијата. Вработените чувствуваат поголема одговорност кон компанијата која им овозможува да растат и напредуваат врз основа на позитивните критики кои им даваат насока за подобрување. Негативниот критицизам пак, делува сосема спротивно на компанијата. Вработените би биле постојано под притисок од негативните коментари упатени кон нив. Со текот на времето, наместо да се фокусираат на позитивен развој на своите вештини и на компанијата, ќе бидат сосредоточени само на негативните особини кои ги поседуваат без идеја да ги променат.
Давањето на позитивни критики не е вродена вештина, па еве, неколку совети за позитивно критизирање:
- Фокусирајте се на активноста, не на личноста. Критиката ја упатувате кон одредена активност, а не кон личноста која ја извршила таа активност. Заземете објективен пристап, за да не ја доведете личноста да се почувствува некомпетентна и неодговорна.
- Давајте фидбек на приватен состанок. Секоја критика упатена кон некого јавно, било да е позитивна или негативна, ќе биде разбрана негативно.
- Сендвич- методот е многу ефикасен за да се одржи позитивната нота на критиката. Започнете со позитивните аспекти на ситуацијата или активноста која ја адресирате. Потоа навлезете во критиката која сакате да ја упатите, за на крајот повторно да наведете позитивна забелешка која спротивната страна ќе може да ја реализира.
Како и сите други вештини, давањето и соочувањето со позитивни критики се вежба и усовршува доколку се практицира секојдневно.
Започнете денес! И веднаш ќе ги забележите позитивните промени, како во приватниот така и во професионалниот живот.
